Ehunka lagun ibili dira Loiolako Santutegiraino abegi ona eta bakearen alde

Alboan Alboan
20/06/2022
Bake Bideak

Aurten ere, Ospitalitate Bideak ibili gara, abegi onaren, elkartasunaren eta harreraren kultura sustatzeko. Etxea utzi eta indarkeriatik, baliabiderik ezetik edo klima-aldaketatik ihes egitera behartutako hainbeste pertsonaren egoerak eraldatu egiten gaitu.

Ukrainakoa bezalako gatazken aurrean, baita indarrean dauden baina ahaztuta dauden beste batzuen aurrean ere, hala nola Siria, Yemen, Etiopia eta abar, Ospitalitate Bideak Bake Bideak izatea nahi dugu. Oinez abiatuko gara berriro, pertsona guztiek indarkeriarik gabe bizitzeko duten eskubidea aldarrikatzeko, beren jatorrizko lekuetan, iraganbidean edo helmugan bizimodu duina izateko eskubidea aldarrikatzeko.
 

Hori dela eta, ekainaren 19an, igandea, ia 300 lagun iritsi ginen Euskadi eta Nafarroako hainbat tokitatik, Aizpurutxotik Loiolako Santutegira (Azpeitia, Gipuzkoa) dauden 10 kilometroak egiteko.

Jardunaldia familiartean eta lagunen artean, Loiolako Plataforma Apostolikoaren obrek bultzatuta, giro ederrean ospatu genuen, udaberriko eguraldi eguzkitsuak lagunduta. Urtean zehar jarraipena izango duen konpromisoaren eta elkartasunaren jaia.

 

Gure eskaerak

10 ESKAERA adierazten dizkiegu Europako erakundeetako ordezkariei, beren etxeetatik urrun babesa bilatzera behartuta dauden pertsonen giza eskubideak betetzen direla berma dezaten:

  1. Bakea sustatzea, herrien arteko bizikidetzarako bide posible bakarra den aldetik. Elkarrizketa eta elkar ulertzea izan behar dira munduan bake iraunkorra eta sendoa bermatzeko tresnak.
  2. Europar Batasunean asiloa eskatzeko eskubidea eta gerraren izugarrikeriatik ihes egiten duten herritarrak babesteko politikak eraginkortasunez bermatzea, bereziki egoera ahulenean egon daitezkeen pertsonak kontuan hartuta. Ukrainako biztanleriaren adibidearekin frogatuta geratu da borondate politikoa badago abegi oneko erantzun horiek posible izan daitezkeela.
  3. Sartzeko eta egoteko bide seguruak eta legezkoak ezartzea, eta birkokatze-prozesuak, bisa humanitarioak eta familia berriz elkartzea bultzatzea.
  4. Iristen diren pertsonei harrera egiteko sistemak zabaltzea, baita nazioarteko babesa eskatzen dutenei harrera egiteko sistemak ere, plaza nahikoak eta gutxieneko duintasun-baldintzak bermatuz.
  5. Migrazioari eta Asiloari buruzko Europako Ituna osatzen duen arau-esparru berria Europako herrialdeen arteko benetako elkartasunean eta Giza Eskubideekiko eta Batasunaren balioekiko konpromisoan oinarrituta dagoela defendatzea EBn.
  6. Sufrimendua eragiten duten migrazio-praktika errepresiboei amaiera ematea, hala nola migratzaileen atxiloketa, barneratzea eta itzulketa sumarioak, bai lurraldean, bai lurreko eta itsasoko mugetan.
  7. Integrazioa sustatzea, kulturen aberastasunak aitortu eta balioesten dituen noranzko biko prozesu gisa, derrigorrezko migrazioen eta babeslekuaren kausak ezagutzen dituen eta elkartasunarekin, giza eskubideekin eta abegikortasunaren kulturaren eraikuntzarekin konprometituta dagoen benetako herritartasun globala eratzen lagunduz.
  8. Mugak zeharkatzen dituzten pertsonen bizitzak salbatzea eta beren eskubideen alde borrokatzen diren erakunde humanitarioak eta pertsona defendatzaileak defendatzea.
  9. Bizileku- eta/edo lan-baimenak berritzeko eta lortzeko baldintzak eta prozedurak malgutzea, gerora sortutako irregulartasunari aurre egiteko eta gizarteratzea eta aukera-berdintasuna sustatzeko, bereziki COVID-19 osteko testuinguruan.
  10. Garapenerako Nazioarteko Lankidetza indartzea, Errenta Nazional Gordinaren % 0,7 Garapenerako Laguntza Ofizialera bideratuz, GLOren % 10 Giza Laguntzara bideratuz eta horren % 6 testuinguru horietako hezkuntzara bideratuz, haurrek eta nerabeek kalitatezko hezkuntza jasotzeko duten eskubidea bermatzeko.

 

Aurreko urteetan ekintzak Errefuxiatuen Nazioarteko Egunaren (ekainaren 20a) inguruan egiten baziren ere, aurten ibilaldiak egingo ditugu urteko hainbat unetan: Migratzaile eta Errefuxiatuen Munduko Eguna (irailaren 25a), Frantzisko Aita santuak bultzatua, "Etorkizuna eraiki migratzaileekin eta errefuxiatuekin" leloarekin, baita Pertsona Migratzaileen Nazioarteko Egunean ere (abenduaren 18a).

 

Ospitalitate-bideei buruz gehiago jakiteko, https://caminosdehospitalidad.alboan.org/hasiera/
 

Laguntzeko, klikatu hemen:

Kategoria: