Dena galtzen denean, eskolak babestu egiten du
Errefuxiatuen Nazioarteko Eguna dela eta (ekainaren 20a), Alboan eta Entreculturas GKEok Eskola Babesa kanpainaren beste edizio bat aurkeztu dugu prentsaurreko batean. Horren bidez, eskolak munduan errefuxiatuta eta desplazatuta dauden 49 milioi haur eta nerabeentzat gune seguru eta abegitsu gisa duen garrantzia azpimarratu nahi dugu.
Aurten, ‘Hezkuntza da haien defentsarik onena’ lelopean, kanpainaren helburua da agerian uztea zein garrantzitsua den hezkuntza gerraren aurrean defendatzea, haurrak errekrutatzearen biktima izan beharrean heztea eta hezkuntzak bakea eraikitzea liskarraren ordez. ACNURen azken txostenaren arabera, gatazka horiek, hondamendi naturalekin batera, inoiz ez bezalako desplazamendu-krisia eragin dute: 123,2 milioi desplazatu (42,7 milioi errefuxiatu eta 73,5 milioi barne-desplazatu).
Luca Fabrisek, Entreculturaseko Giza Mugikortasuneko Taldeko arduradunak, ireki du prentsaurrekoa, kanpaina aurkeztuz eta ideia nagusi bat berretsiz: “indarkeriak zauritutako mundu batean, mundu osoan indarrean dauden 56 gatazka bortitzekin, hezkuntzak bizitzak babestu, birgaitu eta salbatzen ditu”. Fabrisek nabarmendu zuen Alboanek eta Entreculturasek JRSrekin batera egindako lana krisi luzeek kaltetutako herrialdeetan, hala nola Kolonbian, Libanon, Kongoko Errepublika Demokratikoan eta Txaden; eta azpimarratu zuen garrantzitsua dela hezkuntza segurua eta eraldatzailea izateko aukera indartzea. “Errealitate horren adibide argia –gaineratu zuen– Kenya da, eskualdean errefuxiatuak hartzeko herrialde nagusietako bat.”
Ondoren, Obed Ombuna Ekialdeko Afrikako Errefuxiatuentzako Jesuiten Zerbitzuko (JRS) Hezkuntzako Eskualdeko Koordinatzaileak hartu zuen hitza, eta azaldu zuen nola Keniako Dadaab eta Kakumako errefuxiatuen esparruetan inguruko herrialdeetatik (Hego Sudan, Etiopia edo Kontxia Demokratikotik, besteak beste) lekualdatutako 700.000 pertsona hartzen dituzten. “Leku horietan eskola da espazio seguru eta egituratu bakarra, haurrei ikasteko ez ezik, normaltasuna eta itxaropena berreskuratzen hasteko aukera ematen diena”, adierazi zuen. Indarkeria murrizteko eta erkidego desplazatuen ehun soziala berreraikitzeko irakasleen papera ere balioan jarri zuen Ombunak. “Errefuxiatuen esparruan irakastea izan zen egin dudan esperientziarik gogorrenetakoa, baina baita atseginenetakoa ere”, esan zuen.
Prentsaurrekoa Lucia Rodriguez Donate Entreculturas Eragin Politikorako Saileko arduradunaren hitzaldiarekin amaitu zen, eta kanpainako gomendio nagusiak helarazi zituen, hezkuntza larrialdi baten hasieratik bermatzeko eta krisi-testuinguruetan hezkuntza-sistemei baliabide egonkorrak emateko beharra azpimarratuz. “Gero eta abegitsuagoa den mundu honetan, non mugak ixten diren eta segurtasun-gastua handitzen ari den, Alboanek eta Entreculturasek “hezkuntzan gehiago inbertitzearen alde egiten dugu; epe luzera bakea eta justizia babesten eta sendotzen dituen hezkuntza baten alde, eta nahitaezko lekualdatzean biztanleriaren defentsarik onena den hezkuntza baten alde”, adierazi zuen Rodríguez Donatek.
Babes Eskola kanpainak material pedagogikoak, dinamika parte-hartzaileak eta sentsibilizazio-jarduerak ere barne hartzen ditu, ikasleek uler dezaten hezkuntzak zer balio duen indarkeria- eta desplazamendu-testuinguruetan.
