Alboanek komunikazio inklusiboko eskuliburu bat argitaratu du berdintasunarekiko konpromisoa indartzeko
Erakundeko Genero Taldeak egin du gida, eta erakundeen arteko komunikazioa ikuspegi inklusibo batetik hobetzeko gako praktikoak, adibideak eta irizpideak biltzen ditu. Alboaneko taldeari zuzenduta badago ere, erreferentzia izan daiteke erakunde aliatuentzat, enpresa hornitzaileentzat eta erakunde laguntzaileentzat.
Egunerokorako pentsatutako gida
Alboanek Komunikazio Inklusiboaren Eskuliburua aurkeztu dio taldeari. Dokumentu hori tresna praktiko gisa sortu da, komunikatzeko modua hobetzeko, bai barnean, bai kanpoan, genero- eta ekitate-ikuspegitik.
Alboaneko Genero Taldeak bultzatu eta idatzi du eskuliburua, erakundearen arlo guztietan berdintasuna zeharkako bihurtzeko prozesuaren barruan. Helburua da taldeari orientazio argiak, adibide irisgarriak eta baliabide zehatzak ematea eguneroko komunikazioan hizkuntza inklusiboa txertatzeko: posta elektroniko eta aurkezpenetatik hasi eta kanpaina eta material bisualetaraino.
Modu bidezkoagoan eta adierazgarriagoan komunikatzeko baliabide
bat
Gida bi bloke handitan egituratuta dago. Lehenengoan, kontzeptuzko gakoak eta hausnarketak eskaintzen dira hizkuntzak desberdintasun eta estereotipoen eraikuntzan duen zereginari buruz, mitoak eta ohiko erresistentziak desmuntatuz. Bigarren blokeak tresna-kaxa gisa funtzionatzen du, inor kanpoan utzi gabe hitz egiteko, idazteko eta diseinatzeko proposamen aplikatuekin, eta, gainera, zabaldu aurretik materialak berrikusteko egiaztapen-zerrenda bat du.
Alboaneko taldearentzat pentsatutako dokumentua bada ere, erakundeak bere balioak partekatzen dituzten beste erakunde batzuen esku jarri nahi izan du, hala nola erakunde aliatuen, aholkularitza laguntzaileen edo enpresa hornitzaileen esku.
Aste honetan aurkeztu dute eskuliburua, eta dagoeneko deskargatzeko moduan dago. Antolakuntzak tresna hori erabiltzera, partekatzera eta egokitzera animatzen du, komunikazio-prozesuei justiziaren eta inklusioaren ikuspegitik lagunduko dien tresna bizi gisa.
