Ceutan kanporatzeak azkartzeko dekretuak izango duen eraginaz ohartarazi dute giza eskubideen aldeko erakundeek
Giza eskubideen aldeko erakundeak ohartarazi dute Gobernuak Ceutan kanporatzeak eta itzulketak azkartzeko asmoa duen Errege Lege Dekretuak ondorio larriak izan ditzakeela asilo-eskubidean eta nazioarteko babesean. Alboanetik bat egiten dugu kezka horrekin eta erakundeek giza eskubideen errespetua eta asilo-prozedurarako sarbide eraginkorra bermatzeko egindako eskaerarekin.
Erakundeek salatu dutenez, proposamenak, praktikan, “tokiaren eta denboraren araberako asilo eskubidearen salbuespen erregimena” ezartzen du, Ceutan dauden pertsonentzako neurri espezifikoekin.
Kezka nagusietako bat da 2026ko uztailaren 30etik nazioarteko babes-eskaera aurkeztu dutenei atzeraeraginez aplikatzea
Aurreikusitako neurrien artean dago aurkeztutako asilo-eskaerak ez onartzea, itzultzeko edo kanporatzeko agindu bat jakinarazi eta zazpi egun igaro ondoren. Halaber, bost egun naturalera murriztuko luke helegitea aurkezteko epea ; erakundeen arabera, neurri horrek justiziarako sarbidea zaildu dezake, eta benetako babes judizialerako eskubidea kolokan jar dezake.
Era berean, proposamenean jasotako jakinarazpenen salbuespenezko sistemaz ohartarazi dute erakundeek. Kasu jakin batzuetan, komunikazioak Estatuko Aldizkari Ofizialaren bitartez (BOE) egin litezke, eta horrek babesgabetasun-egoerak sor litzake, bereziki egoera bereziki ahulean dauden pertsonen artean.
Neurri horien aurrean, erakundeek Gobernuari eskatzen diote atzera bota dezala proposamena, eta aplika dezala Migrazio eta Asilorako Europako Ituna asilo-eskubidea ahalik eta gutxien kaltetzeko moduan, hitzeman bezala.
Alboanetik bat egiten dugu eskari horrekin, eta pertsonen duintasuna, giza eskubideak eta nazioarteko babesa eskatzeko eskubidearen berme eraginkorra erdigunean jartzen dituzten migrazio-politikak aldarrikatzen ditugu
