Pertsona migratzaileen erregularizaziorako aurrerapausoak
Urtarrilaren 27an Espainiako Gobernuak iragarri zuen tramiteak hasi dituela baimen administratiborik gabe herrialdean bizi eta lan egiten duten migratzaileak erregularizatzeko ezohiko prozesu baterako. Neurria Errege Dekretu bidez onartu zen, eta ehunka mila pertsonari eragiten dien ahultasun-egoera luze bati erantzuna ematea du helburu.
Dekretuak egoitza- eta lan-baimena eskuratzeko aukera emango die 2025eko abenduaren 31 baino lehen Espainiako Estatuan jarraian egon direla egiazta dezaketen atzerritarrei, bai eta beste baldintza administratibo batzuk betetzea ere, besteak beste aurrekari penalik ez izatea.
Urrats garrantzitsua, gizarte zibilak bultzatua
Erregularizazio-prozesu hori erakunde sozialek eta herritarren mugimenduek hainbat urtez aldarrikatu ondoren iritsi da; izan ere, irregulartasun administratiboak pertsona migratzaileen bizitzan duen eragina salatu dute. Ehunka mila sinadurek babesten duten HEL Regularización Ya bezalako ekimenek eztabaida publikoaren erdigunean jarri dute eskubide eta bizi-baldintza duinak bermatzeko beharra.
Administrazio-irregulartasunak migratzaileak lan-prekarietate, gizarte-bazterketa eta eskubide-urraketa egoeretara eramateaz gain, oinarrizko zerbitzuetara iristea eta gizartean erabat parte hartzea zailtzen du.
Inpaktu soziala eta gainditu gabeko erronkak
Gobernuak berak egindako kalkuluen arabera, dekretuak milioi erdi pertsona ingururi egin liezaieke mesede, lan-merkatu formalean sartzea erraztuz eta oinarrizko eskubideetarako sarbidea indartuz. Jesusen Lagundiaren Gizarte Sektoreko erakundeek, Alboanek, adibidez, positibotzat jotzen dute aurrerapen hori, gizarte-kohesioa hobetzen eta esplotazio-egoerak murrizten lagun baitezake.
Hala ere, azpimarratu behar da ezohiko erregularizazioa ezin dela neurri isolatua izan. Migrazio-politika bidezkoago, egonkorrago eta giza eskubideetan oinarrituago baterantz egin behar da, irregulartasun administratiboaren kronifikazioa saihestuko duena eta migraziorako bide legal eta seguruak bermatuko dituena.
